Infurmaziuns impurtantas per far in conto e per il login:
In'adressa dad e-mail ed in numer da l'assicuranza sociala (nr. AVS) pon vegnir registrads mo ina giada resp. assegnads mo ad in conto. Il medem numer da l'assicuranza sociala (nr. AVS) e/u la medema adressa dad e-mail na pon betg vegnir duvrads per pliras persunas en furmaziun resp. per plirs contos!
Per mintga persuna en furmaziun, per la quala vulessan vegnir dumandads stipendis, sto vegnir avert in conto separà resp. sto vegnir fatg in login separà. Il login resp. il conto è persunal. Il conto persunal permetta a la persuna en furmaziun d'inoltrar mo ina dumonda da stipendis per onn da furmaziun.
Vus possedais gia in conto «portal per stipendis»:
Cun il link qua sutvart As pudais Vus annunziar ed emplenir Vossa dumonda da stipendis.
→
Vinavant a la pagina da login
Vus vulais far in nov conto «portal per stipendis»:
→
Vinavant per far in conto cun in'adressa dad e-mail valaivla e cun in pled-clav
Infurmaziuns impurtantas, cundiziuns d'utilisaziun, indicaziuns giuridicas ed basa giuridica:
→ INDEX «Infurmaziuns impurtantas»
→ INDEX «Cundiziuns d'utilisaziun ed indicaziuns giuridicas Portal per stipendis»
→ INDEX «Basa legala»
Infurmaziuns impurtantas:(↑ Cumenzament da la pagina)
Termin d'inoltraziun
Obligaziuns da la persuna petenta
Concessiun e restituziun da stipendis
Midar la furmaziun
Furmaziuns cun dretg da survegnir contribuziuns e durada dal dretg da survegnir contribuziuns
Praticums, semesters da congedi e doctorats ed habilitaziuns
Semesters resp. onns da barat
Curs da lingua
Agid uffizial
Termin d'inoltraziun:(↑ Index)
Dumondas da stipendis ston vegnir inoltradas entaifer 3 mais suenter che la furmaziun resp. l'onn da scola ha cumenzà!
Stipendis ston vegnir dumandads da nov per mintga onn da furmaziun e na pon vegnir concedids ni en moda retroactiva ni ordavant!
Ulteriuras infurmaziuns impurtantas tar la procedura d'endataziun d'ina dumonda da stipendis:
- Avant il cumenzament da la furmaziun resp. da l'onn da scola na pon vegnir inoltradas naginas dumondas.
- Per ina dumonda da stipendis sto il termin d'inoltraziun vegnir observà en mintga cas (decisiv è il bul postal).
- Sch'i n'èn betg avant maun tut ils documents necessaris per inoltrar la dumonda da stipendis, sto ella tuttina vegnir inoltrada entaifer il termin.
- La cumprova che la dumonda da stipendis saja vegnida inoltrada entaifer il termin fixà sto vegnir furnida da la persuna petenta resp. da la persuna en furmaziun.
- Dumondas che vegnan inoltradas cun retard vegnan calculadas pro rata temporis. Il temp, per il qual i pon vegnir pajads stipendis, sto importar almain 3 mais.
Obligaziuns da la persuna petenta:(↑ Index)
La persuna petenta sto emplenir la dumonda confurm a la vardad e cumplettamain, ella sto la suttascriver en furma giuridicamain valaivla e l'inoltrar a temp ensemen cun ils documents dumandads a la secziun stipendis.
La petenta u il petent è obligà da communitgar immediatamain ed en scrit eventualas midadas. Talas midadas èn per exempel (l'enumeraziun n'è betg definitiva):
- interrupziun definitiva da la furmaziun cun inditgar ils motivs
- interrupziun da la furmaziun cun inditgar ils motivs
- retschaviment da rentas d'uffants
- ils geniturs da la persuna ch'è en furmaziun midan domicil durant l'onn da furmaziun
- la persuna ch'è en furmaziun mida domicil durant l'onn da furmaziun
- terminaziun da la furmaziun cun ans trametter la cumprova da finiziun
- e.u.v.
La violaziun da questas obligaziuns po chaschunar che disposiziuns, ch'èn gia vegnidas relaschadas, vegnan revocadas u ch'i na vegn betg entrà en ina dumonda pendenta.
Concessiun e restituziun da stipendis:(↑ Index)
Stipendis na pon vegnir concedids ni retroactivamain ni ordavant.
Stipendis ston vegnir restituids, sch'els èn vegnids obtegnids cun far indicaziuns faussas.
En cas che la furmaziun vegn interrutta u smessa, ston las contribuziuns gia pajadas vegnir restituidas per la part da la furmaziun che na vegn betg pli frequentada.
Midar la furmaziun: (↑ Index)
Sch'ina furmaziun vegn midada avant la fin dal segund onn da furmaziun, perquai che la furmaziun na correspunda betg a las abilitads ed a las preferenzas da la stipendiata u dal stipendiat, vegnan pajadas contribuziuns er per la furmaziun che vegn cumenzada da nov.
Sche la furmaziun vegn midada suenter il segund onn da furmaziun, vegnan pajadas contribuziuns da furmaziun, ma il temp, per il qual contribuziuns da furmaziun èn gia vegnidas concedidas, minus dus onns, vegn quintada tar la durada ordinaria da la furmaziun. Il temp vegn mess a quint il mument ch'i vegn cumenzà cun la nova furmaziun.
Sche la furmaziun vegn midada ina segunda giada, han ins mo pli il dretg da survegnir emprests da daners per la furmaziun che vegn cumenzada da nov. Il dretg da puspè survegnir stipendis exista pir, sch'ina furmaziun è vegnida terminada cun success.
Furmaziuns cun dretg da survegnir contribuziuns e durada dal dretg da survegnir contribuziuns:(↑ Index)
Il dretg da survegnir contribuziuns vala per furmaziuns sin il stgalim secundar II e sin ils stgalims che al suondan. Per ina furmaziun che vegn frequentada en in gimnasi en il rom dal studi tenor las directivas naziunalas pon er vegnir pajadas contribuziuns da furmaziun. La 1. e la 2. classa dal gimnasi inferiur èn senza dretg da survegnir contribuziuns. La furmaziun sto terminar cun in diplom che vegn renconuschì dal stadi, en il qual ella vegn absolvida, da la confederaziun u dal chantun, en il qual ella vegn absolvida.
Tar furmaziuns da plirs onns cumpiglia il dretg da survegnir contribuziuns la durada ordinaria da la furmaziun plus dus semesters. Entaifer quest temp da furmaziun vegnan concedidas contribuziuns da furmaziun mo per in onn da repetiziun. En cas da furmaziuns d'in onn na vegnan concedidas naginas contribuziuns per prolungaziuns u per repetiziuns. La durada dal dretg da survegnir contribuziuns po vegnir prolungada excepziunalmain en spezial en cas da malsogna, d'accident u da gravidanza. Sche la furmaziun vegn interrutta, na vegnan pajadas naginas contribuziuns da furmaziun durant quest temp.
Praticums, semesters da congedi e doctorats ed habilitaziuns:(↑ Index)
Per praticums durant la furmaziun pon vegnir pajads stipendis. In'eventuala indemnisaziun da quest praticum vegn quintada sco il salari d'emprendista u d'emprendist.
Per praticums avant il cumenzament da la furmaziun u suenter la fin da la furmaziun, per onns u per semesters da congedi sco er per lavurs da doctorat e per habilitaziuns na vegnan pajads nagins stipendis.
Semesters resp. onns da barat: (↑ Index)
Per in semester u per in onn da barat che vegn absolvì a l'exteriur pon vegnir pajads stipendis, sche quest semester u onn vegn renconuschì da la scola svizra e sch'el vegn quintà da quella per la prestaziun da furmaziun che sto vegnir furnida.
Curs da lingua:(↑ Index)
Per curs da lingua pon vegnir pajads stipendis mo, sche l'absolventa u l'absolvent ha in'emprima furmaziun che permetta da pratitgar ina professiun e sche l'instrucziun ad ina scola dal di ha lieu cuntinuadamain durant almain 16 emnas en il territori linguistic correspundent.
Agid uffizial:(↑ Index)
Il servetsch per stipendis e las autoritads dal chantun, dals districts, dals circuls e da las vischnancas che elavuran datas dattan vinavant datas ch'èn impurtantas per exequir la lescha da stipendis.
I ston vegnir dadas vinavant las suandantas datas da persunas petentas e da persunas che han in'obligaziun da mantegniment u da sustegn envers questas persunas:
- persunalias;
- indicaziuns davart il stadi civil, davart il lieu da domicil e da dimora, davart la permissiun da dimora e davart las relaziuns d'entrada e da facultad;
- prestaziuns da la communitad.
Cundiziuns d'utilisaziun ed indicaziuns giuridicas Portal per stipendis:(↑ Cumenzament da la pagina)
1. Champ d'applicaziun
2. Annunzia e renconuschientscha
3. Prestaziuns dal gestiunari
4. Prestaziuns da las persunas petentas
5. Dimensiun e midada dal servetsch prestà
6. Renviaments e links
7. Protecziun da datas
8. Exclusiun da la responsabladad
9. Copyright
10. Dretg applitgabel e dretgira cumpetenta
1. Champ d'applicaziun:(↑ Index)
Questas cundiziuns d'utilisaziun ed indicaziuns giuridicas valan per la registraziun e per l'utilisaziun dals servetschs online protegids dal servetsch per stipendis dal Grischun. Ellas reglan l'access a tscherts servetschs electronics via internet.
2. Annunzia e renconuschientscha:(↑ Index)
2.1 Annunzia ed identificaziun
Tar l'annunzia al portal definescha la persuna en furmaziun in num d'utilisaziun ed in pled-clav per l'access direct ch'è alura pussaivel. Per num d'utilisaziun po vegnir registrada ina dumonda da stipendis per onn da furmaziun. La persuna en furmaziun vegn identifitgada al portal sin basa dal e-mail, dal numer da l'assicuranza sociala (nr. AVS) e dal pled-clav.
2.2. Acceptaziun da las cundiziuns d'utilisaziun e da las indicaziuns giuridicas
Cun far in conto resp. cun la procedura d'annunzia accepta la persuna petenta las cundiziuns d'utilisaziun e las indicaziuns giuridicas.
3. Prestaziuns dal gestiunari:(↑ Index)
3.1 Disponibladad
Ils servetschs online stattan a disposiziun mintga di durant 24 uras. Tscherts servetschs pon vegnir purschids mo durant tschertas uras. Il gestiunari ha il dretg d'interrumper da tut temp ils servetschs purschids, sche quai para d'esser inditgà per motivs impurtants p.ex. pervia da disturbis, pervia da lavurs da mantegniment, pervia dal privel d'abus e.u.v.
3.2. Segirezza
Cun sviluppar ils servetschs online èsi vegnì dà in quità spezial a la segirezza. Las persunas petentas prendan enconuschientscha ch'ina segirezza ed ina correctadad absoluta dals sistems e da las proceduras duvradas na pon betg vegnir garantidas malgrà tut las stentas e malgrà l'applicaziun da tecnologias las pli modernas e standards da segirezza actuals. Il gestiunari sa reserva da pudair introducir da tut temp auters elements da segirezza u in'autra furma da l'autentificaziun da las persunas petentas.
3.3. Confidenzialitad
Sche persunas petentas dovran ils servetschs online, vegnan lur datas transferidas sur in chanal electronic segirà. Percunter pon vegnir transferidas ed ellas infurmaziuns per e-mail, pia tras in chanal che n'è betg segir. Las persunas petentas prendan enconuschientscha che – en cas d'ina correspundenza per e-mail – tant l'adressa dal speditur sco er quella dal retschavider, ma er las ulteriuras infurmaziuns pon vegnir enguladas e legidas da terzas persunas.
3.4. Pussaivladads da bloccar
Il gestiunari sa reserva la pussaivladad da bloccar l'access da singulas ubain da tut las persunas petentas a singuls u a plirs servetschs. Sch'in tschert dumber da provas betg valaivlas vegn surpassà tar l'annunzia al portal, po vegnir activada ina bloccada automatica.
4. Prestaziuns da las persunas petentas:(↑ Index)
4.1 Pretensiuns minimalas
L'utilisaziun dals servetschs online sto vegnir fatga tras in program d'internet (browser) actual. Tar tscherts servetschs online sto l'utilisaziun da "cookies" esser permessa.
4.2. Obligaziun d'avair quità
La persuna petenta è responsabla per l'utilisaziun dal portal. Ella sto garantir ch'ils elements da segirezza (p.ex. num d'utilisaziun e pled-clav) restan secrets e vegnan protegids cunter l'utilisaziun abusiva tras persunas nunautorisadas. En spezial na dastga il pled-clav ch'è vegnì definì per l'annunzia al portal betg vegnir registrà u deposità en moda nunprotegida. Sch'il pled-clav è ì a perder, sto ella dumandar in nov en il rom da la procedura d'annunzia. Sch'il num d'utilisaziun è ì a perder, sto ella far ina nova annunzia tenor il punct 2 «Annunzia e renconuschientscha».
5. Dimensiun e midada dal servetsch prestà:(↑ Index)
La dimensiun dals servetschs prestads dal portal po midar da tut temp.
6. Renviaments e links:(↑ Index)
Questa pagina d'internet po cuntegnair renviaments e links (colliaziuns) a paginas d'internet da terzas persunas. Quellas sa chattan ordaifer il champ da responsabladad dal chantun Grischun. L'access e l'utilisaziun da talas paginas d'internet han lieu sin agen ristg da l'utilisadra u da l'utilisader. Las autoritads chantunalas decleran expressivamain ch'ellas n'hajan nagina influenza sin la concepziun, sin il cuntegn e sin las purschidas da talas paginas d'internet.
7. Protecziun da datas:(↑ Index)
Sa basond sin l'artitgel 13 da la constituziun federala e sin las disposiziuns dal dretg davart la protecziun da datas da la confederaziun e dal chantun ha mintga persuna il dretg da la protecziun da sia sfera privata sco er il dretg da la protecziun cunter l'abus da sias datas persunalas. Questas disposiziuns vegnan observadas. Las datas persunalas vegnan tractadas en moda strictamain confidenziala.
8. Exclusiun da la responsabladad:(↑ Index)
La persuna petenta è sezza responsabla per las datas e per ils cuntegns ch'ella transferescha.
Il chantun Grischun guarda cun grond quità che las infurmaziuns publitgadas sajan correctas. Tuttina na poi vegnir surpiglià nagina garanzia che las infurmaziuns publitgadas sajan correctas, exactas, actualas, fidaivlas e cumplettas.
Pretensiuns da responsabladad cunter las autoritads chantunalas pervia da donns materials u immaterials ch'èn resultads tras l'access u tras l'utilisaziun resp. tras la nunutilisaziun da las infurmaziuns publitgadas, tras l'abus da la colliaziun u tras disturbis tecnics, vegnan exclus. Exclusa da la responsabladad è er la garanzia che la purschida online stettia permanentamain a disposiziun.
Il chantun Grischun sa resalva expressivamain il dretg da midar, da stizzar u da betg publitgar per in tschert temp – dal tuttafatg u per part – ils cuntegns, e quai da tut temp e senza annunzia.
9. Copyright:(↑ Index)
L'entir cuntegn da questa pagina d'internet è protegì tenor il dretg d'autur (tuts dretgs resalvads). Tut ils dretgs da proprietad restan tar il chantun. Da princip èsi permess da chargiar giu e da stampar cuntegns u parts dals cuntegns. Qua tras na vegnan dentant transferids nagins dretgs vi dals cuntegns. Senza avair ordavant il consentiment en scrit da las titularas e dals titulars dals dretgs d'autur èsi scumandà da far reproducziuns e modificaziuns e da duvrar vinavant cuntegns da la pagina d'internet ch'èn protegids tenor il dretg d'autur.
10. Dretg applitgabel e dretgira cumpetenta:(↑ Index)
Questas cundiziuns d'utilisaziun suttastattan exclusivamain al dretg svizzer.
La cumpetenza giudiziala è unicamain a Cuira.
Cuira, zercladur 2021
1. Basa legala
2. Obligaziun da surpigliar ils custs en la procedura da recurs
1. Basa legala:(↑ Index)
Disposiziuns da stipendis sa basan sin las suandantas basas legalas:
– Lescha da stipendis (LStip)
– Ordinaziun da stipendis (OStip)
Per la procedura da recurs èn decisivas ils suandants relaschs:
– Lescha davart la giurisdicziun administrativa (LGA)
– Ordinaziun davart ils custs en proceduras administrativas (OCPRA)
2. Obligaziun da surpigliar ils custs en la procedura da recurs:(↑ Index)
En la procedura da meds legals sto tenor l'art. 73 al. 1 (LGA) per regla la partida perdenta surpigliar ils custs.
(↑ Cumenzament da la pagina)